العربات المجرورة ، هل هي شرّ لا بد منه

العربات المجرورة فى مدينة القيروان تعطى طابعا ريفيا لعاصمة الثقافة الاسلامية و تعيق حركة المرور فى شوارعها ، كما انها تساهم فى توسيخ الطرقات بما تلفظه الحيوانات من (.....) و آن الاوان ان يفتح هذا الملف بكل جدية لايجاد حلول عملية و مدروسة له ، ترضى مختلف الاطراف المتداخلة فيه ( البلدية - اصحاب العربات المجرورة - المتساكنون و " برستيج " المدينة ) حتى لا يجوع الذئب و يشتكى الراعي...المختصون فى هذا المجال قادرون على ايجاد الحلّ البديل لهذا المشكل الذى يؤرق الجميع ، حل يستجيب لخصوصيات مدينة القيروان و يساير روح العصر و الحالة الاجتماعية لاصحاب الكارووات
ننتظر مقترحاتكم و تصوراتكم و حلولكم

الكرارطي يقول أنا نحب نخدم بالكريطة ، والقهواجي يقلك أنا نحب نخرج القهوة على المادة، والى عندو كرهبة يقلّك نحب نحط كرهبتي فين نحب ، والكفتاجي يقلك يلزمني نحط القاز والطارمة على المادة باش الزيوت تتسيّب على المادة
هاذم الكل يسترزقوا بفرض قوانينهم عليا وعليكم ولى هو ما يساعدناش وما يتطابقش مع القانون متاع البلاد
لهذا أنا نشوف إلى إذا انحبوا انطبقوا القانون يلزم الحزم وحكاية يسترزقوا منها نحيوها من تفكيرنا
يمكن باش يسترزقوا بوسيلة أخري ، مثلا في بقعة الكريطة يعملوا وسائل نقل بثلاثة عجلات، والله سوقانها أسهل من سوقان كريطة وتكاليفها وتلوثها أقل

في سوسة عاملين "تيك توك" يهزوا فيها الركاب للقنطاوي .. اتنجم جماعة الكرارط تستعملها باش اتهز فيها مواد البناء والخضرة كان لازم منها الحكاية... ولو أني مازلت مافهمتش فين يتحطوا هالجماعة إلى يخدموا عشرين خدمة .. وكيفاش يدفعوا الآداءات

مع العلم أن "تيك توك" موجودة في المشرق وهي وسيلة لنقل البضائع داخل المدن العربي والأزقة ... تتذكروا هاك الثلاثة عجلات بالسيتيرنة إلى كان يستعملها إلى يبيع في القاز في وقتي متاع قبل؟

جاتني فكرة توا . البلدية تنجم تعمل أسطول متاع "تيك توك" تستعملو باش تهز فيهم السواح ويدخلوا للأزقة متاع البلاد العربي الكل وبهكا اتدخّل الفلوس وتعرّف بالمدينة الكل كيف ما يلزم

هذه فكرة تنجم تكون غالطة والبلدية مهياش الطرف المعني لكن هاني نقولها والطرف المعني يتصرّف فيها كان هي مفيدة

بعد ما كتبت التدخلات متاعي قلت بالله خليني نشوف هالتيك توك في محرك قوقل وانشوف كيفاش يستعملوا فيه .. بالطبيعة كيف كتيت تيك توك خرجتلي أغنية تيك توك وتيك توك متاع برشا حاجات غير وسيلة نقل
عاودت كتبت وسيلة نقل تيك توك وقتها اكتشفت إلى اسمها عند جماعة الخليج والمشرق توك توك موش تيك توك
عاد تنجموا اتشوفوا المقالات المكتوبة وكيفاش مستعملة

يظهرلي أنا وسيلة نقل ممتازة وهي الوحيدة إلى تنجم تحل برشي مشاكل وكذلك تكون وسيلة مورد رزق للعديد من الناس
مع العلم أن التوك توك فيه برشى أنواع حسب المهمة إلى باش يقوم بيها