لقاء البلدية والإعلام والمواطن الضمآن

في سهرة رمضانية مفتوحة بقاعة الجلسات ببلدية القيروان كان الحوار مفتوحا بين الحاضرين من ممثلي وسائل الإعلام المختلفة وأعضاء المنتديات الإفتراضية وبعض المواطنين حضره رئيس البلدية والمستشار البلدي رئيس جمعية صيانة المدينة ورئيس لجنة الإعلام بالبلدية وبعض المستشارين من المعارضة ومن التجمع.
الحوار كان مفتوحا جدا حيث وقع التطرق إلى العديد من هواجس القيروان ومشاغلها خاصة ما يخص الأراضي المحتلة بالقيروان في حي النصر والحجام والنحاسين والعشّ والتي تمثل أرقا لكل الناس
تحدث المجتمعون عن الإنارة الشمسية وعن التشجير وعن مشروع القيروان المفقود وعن التراث اللامادي وعن شركة النظافة بطريق حفوز المتخلية عن دورها وعن هموم القيرواني المختلفة وتحدث السيد مراد الرماح عن صيانة المدينة وعن الفسقية التي يرفض أن تقام فيها أيّة منشآت ـ رأي يناقش في لقاء آخر ـ المهم وقع حوار نتمنى أن يثمر انجازات وهو ما وعد به السيد مصطفى الحسين

السلام عليكم،

اللقاء كان مناسبة باهية باش نحكيو بكل صراحة على مشاكل مدينة القيروان و على الحلول الممكنة باش المدينة تفيق من سباتها و ترجع تنافس مع المدن الأخرى إلي فاتتنا خاصة في السنوات الأخيرةأ. و المشكل يكمن في أنّه مقارنة مع الازدياد الهائئل لعدد السكان في السنوات الأخيرة (إلي هي حاجة باهية و إن شاء الله تزيد أكثر باش تعطي أكثر ثقل ديمغرافي للمدينة) طرق العمل في البلدية ما واكبتش التطور هذا و قعدنا نخدمو بالوسائل القديمة كيما وقت إلي كان عدد السكان ما يفوتش ال100 ألف ساكن...في حين أنّ عددهم الآن فات ال 150 ألف ساكن (معناها زيادة متاع 50%...إلي هي نسبة مهولة). و لذا موش معقول باش نقعدوا نخدموا كيما قبل و ما نطوّروش من وسائل العمل متاع بلديتنا.

و تحبّوا أمثلة بسيطة و واقعية على الكلام هذا، بعيدا عن التنظير و الكلام الصعيب؟

عندكم يا سيدي بن سيدي "مرشي" المنصورة إلي فيه انتصاب فوضوي كبير و إلي الانتصاب دخل في وسط "الكيّاس" و ولّى يخلق اختناق مروري في البقعة هذيكا و ولّى يخلق مشاكل و عرك بين الحين و الآخر بين الباعة. إلّي ما يغزرش لبعيد باش يقول "والله قتلونا جماعة الانتصاب الفوضوي و هلكوا البلاد و راهي هذيكا المشكلة الحقيقية". و لكن حسب رأيي المتواضع موش هذيكا المشكل الحقيقي. المشكل الحقيقي هو في غياب التخطيط في السنوات الأخيرة (و هاذي موش مسؤولية المجلس البلدي الحالي فقط و لكن تراكمات المجالس السابقة زادة). قولولي كيفاه؟ يا سيدي بن سيدي، "مرشي" المنصورة هذا عملوه توّة حكاية 30 سنة التالي، وقت إلي المنصورة كانو يسكنوا فيها كعبتين و كعبة. و "المرشي" هذا فيه زوز حوانت متاع خضّارة، و حانوت متاع حوت (و سكّر توّة) و قهوة صغيرة و عطرية (سكّرت زادة). معناها، باش نلخّصوا، حاليا فيه زوز خضّارة.

و لكن فات مسؤولينا إلي عدد سكان النصورة و الأحياء المجاورة إلي تقضي من "المرشي" هذاكا...ولّى قريب ال20 ألف ساكن!!!!! إنتوما تصوّروا 20 ألف ساكن يقضيو من عند زوز خضّارة!!!!! معناها باش تلقى الطلب مئات أضعاف العرض و نتيجة للخلل الكبير هذا، جاو الباعة الفوضويين هذوما و استغلّوا الوضع. هاذي الحكاية الكل. الحكاية الكل إلي البلدية ما طوّرتشي من روحها باش تواكب تطوّر البلاد و تزايد عدد سكّانها و الدليل "مرشي" قعد هو نفسو على امتداد 30 سنة (ياجورة زايدة ما تحطّتشي فيه على امتداد 3 عقود بالتمام و الكمال) في حين أنّ عدد السكان تضاعف عشرات المرات في المدّة نفسها.

و قيس على ذلك مشكلة المرور، و مشكلة تقلّص المساحات الخضراء و مشكلة تكوّن الأحياء العشوائية إلي ولّات كيما الطّوق حول المدينة...معناها المشاكل هاذي ما جاتش بالزهر و لكن هي النتيجة الطبيعية لغياب التخطيط على مدى السنوات الماضية.

على كل حال، ما فاتنا شيء، و في مقدورنا و استطاعتنا, إن شاء الله, باش نصلّحوا الأغلاط هاذي و لكن على شرط أنّ مسؤولينا البلديين (و خاصة رئيس البلدية سي مصطفى الحسين) يقتنعوا بضرورة تعصير طرق العمل و ضرورة وضع برنامج عمل من الآن لمدة ال5 سنوات الباقية. و هاذا هو، حسب رأيي المتواضع، الدور الحقيقي لشيخ المدينة سي مصطفى الحسين و ليس الغرق في التفاصيل اليومية الصغيرة إلي ترهقوا و تضيّعلوا وقتو فيما لا يعني...لين يتعدّاو ال5 سنوات و إحنا ما عملنا شيء و ما قدّمناش حتى خطوة لقدّام

ملاحظة : رغم اختلافي معاه في العديد من النقاط ولكن صدّقوني شيخ المدينة سي مصطفى الحسين كان على مستوى كبير من رحابة الصدر و الأخلاق العالية إلي قلّ و ندر باش شفتهم في مسؤول تونسي. حقيقة شيء يعمل ستة و ستين كيف. و لكن، من المهم زادة باش شيخ مدينتنا، ينفّذ الوعود متاعو (الويفي في الساحات العمومية ـ المخطط المديري للجولان ـ الانفتاح على الآراء الأخرى و تبنّيها إذا كان فيها فائدة للقيروان) و هذا ما يكون كان باهي للمدينة الكل و لسي مصطفى نفسه باش يقدّم بالبلاد و ينسّينا في الخيبات السابقة. و الله المستعان

البقية

تصوّروا لو كان جات الفسقية كلها حيّة و فيها حركة كبيرة و دولاب يدور (كيما في الفضاء متاع "كيدز لاند" إلي مقابل السيد الصحبي)، زعمة يتجرّأ واحد و يمشي "يتّركن" هو و صاحبتو الغادي؟ زعمة تلقى واحد، حاشاكم و حاشى الشهر الفضيل، يشرب في الشراب و يلوّح في الدبوسة في وسط الفسقية؟ زعمة تلقى واحد يقتل واحد آخر و يرمي الجثة الغادي؟

ريت يا سي مراد؟ معناها إنتي كان باش تخلّي الفسقية فضاء فارغ، باش تكون تسّببت بصفة مباشرة في القضاء عليه. و راهو هذوما 5 مليارات موش لعب. معناها بالفلوس هاذي و مع أفكار جيدة، تنجّم تكون، يا سي مراد، السبب في إحداث تغيير كبير و حركية اقتصادية هائلة في القيروان. كيما تنجّم تكون، برفضك إدخال حركية اقتصادية على الفضاء، السبب في إضاعة فرصة لا تعاد للقيروان باش تفيق من نومها. و إنتي دليلك ملك يا سي مراد!!!

و باش ما نخلّيلك حتى فرصة يا سي مراد، نستسمحك باش نحكيلك (و متأكد إلي تعرف الحكايات هاذي بصفتك، و بكل أمانة، خبير ممتاز في الآثار) على زوز مواقع أثرية :

واحد في إيطاليا بمدينة "رافينا" وين فمّا نزل مشهور برشة هو نزل "كاروزو" مبني في قلب الآثار الرومانية إلي هي أقدم بآلاف السنوات من معالم القيروان و حتى واحد ماقال فيها وووووه. و إلا قال "أبدا و يستحيل كان تبني حاجة بحذا الآثار". و نسنتسمحكم يا جماعة باش نقدّملكم صورة المسبح متاع النزل هذا إلي هو في وسط الآثار بالضبط (معناها تعمل عومة و تشلّل في وسط الآثار)

و هاني باش نسكّر فمّي و ما ني باش نقول شيء و نخلّيكم الناس الكل (بما فيكم سي مراد الرماح) تحكموا شنوّة عملوا المغاربة وقت إلي حبوّا يعملوا إعادة تهيئة للفضاء هذا، حسب ماجاء في أحد المواقع السياحية المغربية

يوفى الحديث...

يبدو أننا يا وادجا لم نفهم جيدا مداخلة الدكتور مراد الرماح ففي اتصال هاتفي معه أوضح لي أن موقفه من استغلال الفسقية كان في الماضي بتصدي الجمعية والوكالة لكل المشاريع التشويهية ولكن الآن بالدعم الرئاسي ستقام منشآت عظيمة بها كعرض الموسيقى والماء ومطاعم واماكن ترفيه بطريقة مدروسة وهذا أمر بديهي لأنّه من غير المعقول صرف 5 مليارات على بعض عشب وماء وهو منسجم تماما مع اقتراحات المنتدى ومستعد للتعاون.
هذا خبر جميل نثمنه ولن نبخل على دكتورنا في التعاون