Langue des signes

عِيلة الطـّرُش

خرج راجل من الدار عرضو جارو الملاك صبّح عليه. حشم الراجل وقالو ان شاء الله.
رجع فيسع للدار ونادى مرتو وقا للها:
- يا مرا، الملاك يحبّ على فلوس الكرا.
هزّتو وحطّتو وقالتلو:
- تي اشري بقري ولا علوش.
دخلت بنتها قالتلها:
- ريت بوك؟ رجع باش يسألني على اللحم؟؟
طبّست راسها البنيّة واحمرّ وجهّا و قالت:
- اللي تراووه صالح.
خرجت تجري لممّاتها.
- يا ممّاتي ، يا ممّاتي ، جاو يخطبوفي ّ زوز رجال. وامي قالتلي اشنوّه رايك؟ الحُــرْ ولاّ الوصيف؟؟
شهقت العزوزة :
- أوه يا بنيْتي ، نهار اللي صبحتْ صايمه ثردْتُو العصيده؟؟؟

من حكايات جدّتي منّانة رحمها الله..

السي حمد فلاح رازقو ربي من بابو الواسع. كلف نهار من النهارات الخماس متاعو باش يصدّق كمية باهية من القمح.

نصب سي الخماس طاولة وكرسي وبرّح على الفقارى والمحتاجين وبدا يأمر في الخدام اللي تحت منو:
- اعطي هذا قلبة قمح وهذا شكارة وهذا قلبتين وهذا نص شكارة..
- واللي ياخذ حاجة ما يخلي ما يدعي بالخير على الخماس:
- ربي يرضي عليك والديك، ربي يعليك، ربي يزيدك من خيرو، ربي يكثرهم عليك، ربي..، ربي..


الشيخ متاع القرية يعرف الحقيقة وغاضو الموقف. مشى للسي حمد وقلو:
كيفاش القمح قمحك والناس مشبعة الخماس بدعاء الخير ؟ ماهو حط كرسي بحذاه و

قاطعو سي حمد وقللو: ربي يعرف اشكون عطى القمح.